رواية( شمس وسط الظلام) البارت(35)و(36)بقلم:- أسماء أبوشادي
___________________________
داليا مع عمر أدام كافترية الجامعة
و رودي وشمس جوه بيضحكوا على داليا وتصرفاتها
شمس كانت بتضحك بقوة. وفجأة نبضات قلبها ذادت وبقت سريعة وقوية جدا
ومش بس كدة لاء دا كل نبضة بألم فى جسمها كأن حد بيضرب قلبها بضربات شديدة قاسية. ومش عارفة تتكلم بتتنفس بس روحها بتغيب بتتسرق منها ولون وشها اتحول من الأحمر للاصفر وحطت ايديها على قلبها
رودي لاحظت تغيير ملامح شمس المفاجأ وكمان ايديها اللي حطتها على قلبها فبطلت ضحك
رودي بفزع / مالك يا شمس. حصل ايه ردي عليا يا شمس
شمس بتبصلها ومش عارفة تتكلم ولا تنطق وعايزة تنطق الشهادة حتى مش عارفة
رودي قامت وبتمسك ايد شمس اللي على قلبها. حست بسرعة الضربات حتى في ايديها وكأن القلب ينتفض في كل اعضاء الجسد
رودي خرجت برة بسرعة
كانت داليا بتكلم عمر / قولتلك انا مش عايزة اخرج. تعبانة وعايزة اروح
عمر بتأفف / داليا وبعدين في العند بتاعك دا
في الوقت دا رودي كانت خرجت جري وندهت على داليا من قبل ماتقرب منها
رودي بفزع / داليا داليا. الحقي شمس.
داليا بخضة / في ايه مالها شمس
دخلوا كلهم جرى ومعاهم عمر
كانت شمس لسه على حالها واتأكدت أن خلاص دي النهاية وبتحاول تتشاهد بلسانها لكن برضوه مش قادرة صحيح بتتنفس لكن قلبها بيوجعها ( واه من وجع القلب )
عمر بعد ما شاف حالتها / خليكوا جنبها وحاولوا تخرجوها أدام الكافترية على ما انا اجيب عربيتي برة ونوديها مستشفى بسرعة
في اقل من 3 دقائق كان عمر جاب عربيته برة و داليا. و رودي سندوا شمس وخرجوا بيها ادام الكافترية.
شمس قامت ومشيت معاهم. بس لسه الألم موجود. واحساس ان دي هي النهاية مسيطر عليها كلياً
خرجوا بالعربية من الجامعة. رودي وشمس راكبين ورا وعمر بيسوق العربية و داليا جنبه
داليا ببكاء / بسرعة يا عمر الله يخليك
عمر / اهدي بس يا داليا.
أخيرا ضربات القلب هديت الوجع بيختفي واحدة واحدة كأنه لم يكن وبدأت تعرف تحرك لسانها.
فأتكلمت بصوت ضعيف / اشهد ان لا إله إلا الله وأشهد أن محمدا رسول الله
رودي بلهفة / شمس. شمس حاسة بأيه
داليا بصت عليها / شمس اتكلمي. طمنينا قولي اي حاجة على ما نوصل المستشفى
شمس بتنهيدة وصوت ضعيف/ اطمنوا أنا كويسة. ماتقلقوش.
رودي بدموع / مانقلقش إيه بس دا انتي كنتي بتموتي وضربات قلبك كانت سريعة اوي و وشك اصفر خالص
داليا ببكاء/ احنا قربنا على المستشفى عشان نعرف إيه اللي حصل دا
شمس / صدقوني انا كويسة مافيش داعي للمستشفى
عمر / لا طبعا لازم. نروح ونعرف ايه سبب الحالة إللي أنتي كنتي فيها دي دا اللي يشوفك يقول بتموت
( وصلوا المستشفى ودخلوا. مع ان شمس بقت كويسة ومش حاسة بأي ألم أو وجع لكن كلهم قلقانين إيه سر الحالة اللي كانت فيها
أما شمس فهي تقريبا عرفت سبب اللي حصل دا لكن محتاجة تتأكد
سألوا على دكتور تخصص صدر وأمراض قلبيه ( دا كان طلب شمس لأنها قالتلهم إنها ماكنتش قادرة تاخد نفسها وماقالتلهمش إيه اللي كانت حاسة بيه )
دخلت شمس عند الدكتور. وأصرت تدخل لوحدها وسط اعترضات صحابها لكن في الآخر سمعوا كلامها
الدكتور كان راجل كبير في السن تقريبا عمره يصل لل 60 سنة وجهه بشوش جدا
الدكتور بأبتسامة / خير يا بنتي مالك
شمس والدموع تملئ عينيها / بص يا دكتور قبل أي شيء أنا عايزة من حضرتك وعد انك تصارحني والكلام اللي هقوله دلوقتي أو إي حاجة عن حالتي ماتقولش لحد عنها
الدكتور بأبتسامة / اهدي بس وأن شاء الله خير. وإذا كان على الوعد فأنا أوعدك باللي قولتي عليه قوليلي بقى مالك
شمس / أنا أمي توفت وهي بتولدني لأنها كانت مريضة بالقلب
وانا من وأنا صغيرة بحس أوقات ان قلبي بيوجعني وبنبض بألم
بس الاحساس ده مدته ماكنتش بتكمل 30 ثانية وينتهي. لكن النهاردة زاد جدا. و وصل لحوالي 10 دقايق لدرجة اني ماكنتش قادرة اتكلم ولا حتى اتشاهد وحسيت اني هموت
الدكتور بتفهم / وأنتي شاكة انك ورثتي المرض دا عن ولدتك. صح
شمس / انا فعلاً طول عمري كنت بشك في كدة لكن النهاردة أنا متأكدة. وجيت لحضرتك عشان أتأكد اكتر بس مش عايزة حد يعرف حاجة لا أهلي ولا جوزي وخصوصا اللي معايا برة.
الدكتور بدهشة / انتي متجوزة أنتي عندك كام سنة
شمس بأبتسامة مكسورة / عندي 20 سنة إيه مش باين عليا
الدكتور بأبتسامة / فعلا انا اول مادخلتي قولت عندك 15 سنة. واستغربت من كلامك حسيت انه أكبر من سنك
قام الطبيب بفحص شمس ثم استدعى الممرضة وطلب منها تعملها رسم قلب وشوية فحوصات
خرجت شمس مع الممرضة وهي بتبص للدكتور وبتقوله / حضرتك وعدتني
بصلها الدكتور وابتسم عشان يطمنها
أول ما خرجت من عند الدكتور
داليا و رودي بلهفة / قالك إيه
شمس بأبتسامة كاذبة / اهدوا في ايه اطمنوا هو بس طلب اني اعمل شوية فحوصات عشان يطمن عليا وخلاص
مشيت شمس مع الممرضة ودخلت أوضة الفحوصات عشان تعمل رسم قلب وباقي الفحوصات
عمر أخد داليا و رودي ودخلوا للدكتور عشان يسألوه عن حالة شمس
عمر / طمنا يا دكتور عن شمس الحالة اللي كانت لسه عند حضرتك دلوقتي
الدكتور بأبتسامة / هو حضرتك أخوها ولا جوزها
داليا / لاء انا والانسة رودي صحابها واكتر من أخواتها. وانا ابقى اخت جوزها كمان ودا خطيبي والدكتور بتاعنا في الجامعة
وحضرتك احنا عايزين نطمن عليها ونعرف سبب الحالة اللي كانت فيها من شوية
الدكتور / اطمنوا مافيش حاجة تستدعي القلق هو بس ممكن يكون اجهاد نفسي وجسدي مع قلة نوم. هو اللي أدى للحالة دي وعمتا أحنا بنعملها شوية فحوصات عشان نطمأن اكتر
خرجوا من عند الدكتور وارتاحوا شوية من كلامه
بعد وقت طويل شوية خرجت شمس من غرفة الفحوصات ودخلت للدكتور مرة تانية ولوحدها برضوه
الدكتور بعد أن شاف الفحوصات اللي طلبها منها وبانت على ملامحه انها مش سليمة
الدكتور / بصي يا بنتي أنا وعدتك اني اصارحك أنتي صحيح قلبك مريض لكن الحمد لله حالتك مش متأخرة أوي. وممكن في خلال شهور تتعالجي وتبقي كويسة جدا وتمام. أنا هكتبلك على أدوية لازم تاخديها بنظام وتحافظي على نفسك
شمس ماسمعتش حاجة من كل دا غير كلمتين لسه بيترددوا في عقلها
قلبك مريض قلبك مريض قلبك مريض
الدكتور / سمعاني يا بنتي
هزت شمس رأسها بمعنى اه
فأكمل الدكتور كلامه
الدكتور / تحافظي على نفسك بمعنى بلاش تضحكي جامد. بلاش تجري او تتحركي بسرعة أو تعملي أي حاجة فيها مجهود وبلاش سهر خالص ولا حتى نوم كتير يعني تنامي 8 ساعات فقط لا أقل ولا أكتر
شمس بهدوء وملامح جامدة / في أي حاجة تانية
الدكتور / لا يا بنتي مافيش بس عايزك تطمني وتجيلي بعد 15 يوم تكوني اخدتي العلاج اللي انا كتبتهولك دا بنظام
وهنعمل إشاعة عشان نطمن ونتأكد برضوه
وانا هديكي رقمي الخاص عشان لو احتجتيني في أي وقت تكلميني
قامت وقفت ومدت ايديها
شمس بأبتسامة مزيفة / متشكرة جدا لحضرتك يا دكتور وياريت يا دكتور ما تنساش انك وعدتني
الدكتور سلم عليها / ماتقلقيش يا بنتي وأنا هستناكي بعد أسبوعين عشان نعمل الإشاعة والفحص. ولو احتجتي اي حاجة كلميني علطول بدون تردد واعتبريني زي والدك
ابتسمت شمس ابتسامة باهتة للدكتور وقالت لنفسها / آلاا تعلم أيها الطبيب ان بذكرك كلمة والدي. طعنت قلبي المريض بخنجرٍ
خرجت شمس من عند الدكتور. بعد ما رسمت ضحكة كذابة على وشها عشان تخدع بيها صحابها
كانوا هما واقفين برة ادام الأوضة قلقانين
شمس بمرح / مش معايا فكة والله
الكل ببلاهه / هاا
شمس / ايه واقفين كدة ليه زي اللي واقفين على باب السيدة ههههههههههههه
رودي بغيظ / تصدقي انتي ماعندكيش دم يعني احنا واقفين قلقانين عليكي وأنتي خارجة تتريقي علينا
شمس / وما اتريقش ليه يا اخوتشي مش اطمنت على نفسي الحمد لله. سيبوني بقى اعمل اللي انا عايزاه دا انا كنت بحسب نفسي خلاص هموت
داليا بدموع في عنيها قربت على شمس وحضنتها / 1000 مليون سلامة عليكي ربنا يبعد كل شر عنك
شمس في اللحظة دي محتاجة حضن تنهار فيه فكرت تنهار في حضن داليا وتسمح للجواها بأنه يخرج لكن تراجعت في آخر لحظة
شمس بعدت بهدوء عن حضن داليا / أنا جعانة
رودي / يا اختيييييييييييييييييي شوف بنقولها إيه وهي تقول ايه
شمس بمرح / نهار اسوح أوي جعانة ماكولش يعني همووووووت من الجوع حرام عليكوا. انتوا المفروض تعاملوني أحسن من كدة لأني عيانة
عمر بأبتسامة / 1000 سلامة عليكي يا انسة شمس
داليا / هو حضرتك ماتعرفش إنها مرات اخوية مثلا
عمر بأحراج / اه اسف مدام شمس
شمس بأبتسامة / ولا يهمك يا دكتور وبعدين انت بقيت من عيلتنا يعني تقول يا شمس علطول. حضرتك زي اخويا يا دكتور.
عمر / طبعا وأنتي من قبل ما اعرف انك زوجة مهاب العدلي وأنا بعتبرك اختي الصغيرة
داليا / طيب مش انت كنت عازمني على الغدا ماتاخدنا بقى تغدينا وتكسب فينا ثواب . ولا رجعت في كلامك
عمر بأبتسامة / تحت امرك يا آنسة عنيدة اتفضلوا معايا انا عازمكوا على الغدا
شمس بأحراج / لاء روحي انتي يا داليا مع الدكتور وأنا هروح وابقى اتغدا في البيت
عمر / أنا قولت اني عازمكوا انتوا التلاتة وبعدين احنا دلوقتي مش في الجامعة يعني زي ما انا هناديكي شمس تناديني عمر
شمس بأبتسامة مرح / أوك يا دكتور
دودي / لاء أنا بعتذر بقى منكوا أنا لازم ارجع الجامعة عشان ورايا حاجات في المكتبة
داليا / مش لازم النهاردة يا رورو بقى خليكي بكرة
رودي / يا بنتي انا ماروحتش من يوم الأربع ولازم. أكمل قبل ما انسى واتابع اللي وصلتله
شمس بأبتسامة / خلاص يا حبيبتي روحي ربنا معاكي
رودي حضنت شمس وقالتلها لما تروحي ابقي طمنيني عليكي
وقفت رودي تاكسي ومشيت وشمس. و داليا ركبوا مع عمر في عربيته.
راحت شمس مع عمر و داليا نطعن شيك جدا. وأول ما دخلوا اتصلت داليا بالسواق اللي بيوصلها هي و شمس للجامعة لأنه لسه هناك في الجامعة مايعرفش أنهم مشيوا وبلغته إنهم مشيوا وطلبت منه يرجع القصر
حاولت شمس تاكل وماتبنش اي حاجة وبعد شوية
شمس بأبتسامة كاذبة / الحمد لله أستأذن أنا بقى
داليا بأستغراب / تستأذني تروحي فين
شمس / ايه يا بنتي همشي أنتي عايزاني أقعد عزول ولا ايه
داليا / طب استني هنروح سوا
شمس / لاء خليكي وبعدين انا مش هروح انا لسه هروح المقابر
داليا / طب ما اتصل بالسواق ييجي يوصلنا واروح معاكي
شمس بأبتسامة / انتي عارفة اني بحب أروح لوحدي ومابحبش أخد حد معايا وبعدين انا. هاخد تاكسي. سلام
( لم تمهلها فرصة للرد بحيث أخدت شنطتها ورحلت عنهم )
بعد ما شمس مشيت
عمر بهدوء / ممكن اتكلم بقى معاكي شوية
داليا / اتفضل أنا سمعاك
عمر / أنا اسف على اللي عملته امبارح واني بوستك غصب عنك أنا ماكنتش اقصد. بس صدقيني فكرة انك عندك استعداد تتخلي عن حبك ليا وحبي ليكي لمجرد رفضي لشرطك جننتني
داليا بهدوء / بص يا عمر انا صحيح سامحتك على معاملتك ليا قبل كدة. بس صدقني صعب اني انسى. وانا لما طلبت اننا نتجوز بعد ما اخلص دراستي. ماكنش عقاب ليك. ولا خوف من اني اقصر في مذاكرتي
عمر بتنهيدة / اومال ليه طيب لما هو مش عشان كدة
داليا بخجل وحزن / عمر انا بحبك. ومش حب عادي لاء أنا مجنونة بيك.فضلت 3 سنين أحبك وأنا مش مستنية منك مقابل لحبي
وبمجرد ما اي شاب يحاول يقرب مني كنت بصده وأبعد عنه عشان اكون مخلصة في حبي ليك اللي انا كنت فاكرة انك ماتعرفش عنه حاجة
عمر / انا عارف اني ضيعت وقت كتير من عمرنا واهملت الحب دا بس صدقيني ندمان
داليا / وانا مبسوطة انك معايا دلوقتي لكن أنا خايفة. خايفة تكون مابتحبنيش اد مابحبك.
عمر / أنا بحبك اكتر مابتخبيني بكتييييير أوي
داليا / يبقى انت متعرفش انا بحبك أد أيه
عمر / لو بتحبيني كل الحب دا ليه مش عايزانا نتجوز بسرعة
داليا / كل شئ بوقته حلو يا عمر. أنت بتجاهلك ليا. خلتني أفقد الثقة في نفسي وأنا محتاجة وقت عشان ارجع الثقة دي
عمر بأبتسامة رفع ايديها وطبع قبله عليها / وأنا معاكي. وخودي الوقت اللي انتي عايزاه وعايزك تعرفي اني بموت فيكي. ومستحيل ابعد عنك ابدا
_______________________
أمام المقابر نزلت شمس من التاكسي. ودفعت للسائق الاجرة. ولم تنتبه لهاتفها الذي فصل من كتر اتصال مهاب المتكرر وعدم ردها عليه
مشيت شمس بين القبور بروح عارية وسط جليد من احساسها يشعرها بالضياع
وصلت عند قبر عائلة المصري و ركعت أمام القبر جاسية بقوة تاركة حقيبتها.أرضا دموعها تنزل بشدة على وجهها. ظلت صامته فترة طويلة.
تنزل دموعها فقط بدون اي صوت
ثم نطقت بصوت ضايع
ازيك يا قمر
ازيك يا امي
( سكتت قليلا ثم عادت تتكلم )
أخدت منك لون عيونك وملامحك حتى صوتك
شكلي هو شكلك
ورثتك في كل حاجة
ربنا رزقك براجل يعشقك ويموت فيكي ولسه فاكرك حتى بعد موتك بي 20 سنة
برضوه ورثتك في دي
ربنا رزقني بزوج يعشقني وبيحبني موت
مارو كان دايما بيقولي يا قمر لأني كنت بشبهك في كل حاجة و ورثت عنك كل حاجة
( ثم صرخت عالياً )
ورثت عنك وجع القلب. ورثت مرض قلبك
ااااااااااااه يا امااااااااا
يا أماااااااااااااااااا
تعبانة أوي يا امي محتجالك أوي
مارو أنت سامعني أنت كمان. انا جاية اشتكيلكوا واقعد معاكوا. انا قلبي واجعني أوي. بيوجعني حتى وهو بيدق.
انا كنت حاسة بس كنت بكذب احساسي
من صغري وهو بيوجعني وبتألم لكن كنت بتجاهل وجعي وبقول دا وهم وخوف من سراب
ههههههههههههه لكن ماطلعش سراااااااب
حتى الضحكة اللي برسمها على وشي حرموها عليا.
الدكتور بيقولي ممنوع اضحك. طب بالزمة دا عدل.
استغفر الله العظيم من كل ذنب عظيم
يارب. ياااارب أنا راضية. الحمد والشكر لك على كل شئ
انا رااااااضية يارب
يارب أنا راضية ياااارب
ااااااااااااه ااااااااه
ااااا لم تكمل شمس تلك الصرخة بسبب عودت تلك الحالة التي اصابتها في الجامعة. بسبب كثرة البكاء والصراخ
عاد الوجع في نبضات قلبها
وعادت ترى نهايتها. كم تمنت ان يقبض الله روحها ويرحمها من ذلك العذاب
ظلت في مكانها جاسية على ركبتها تضع يداها على قلبها
بضع دقائق حتى انتهى الألم وعادت ضربات قلبها طبيعية
ثم وقفت وقامت بنفض ثيابها لكي تزيل التراب من على بنطلونها ومسحت دموعها وأخذت شنطة يداها من الارض ورحلت لكي تعود إلى القصر
@@@@@@@@@@@@@@
عادت شمس إلى القصر بوجه شاحب قابلتها داليا
داليا بتوتر وقلق / شمس اتاخرتي ليه وكمان ليه موبايلك مقفول مهاب اتصل بيا
شمس بتعب / اوعي تكوني قولتيله على اللي حصل
داليا بتوتر / لاء ماقلتلهوش
بس الظاهر ان السواق اتصل بيه بلغه أننا مارجعناش معاه على القصر. وهو اتصل بيكي كان تليفونك مقفول و
قاطعتها شمس / المهم لما اتصل بيكي قولتيله إيه
داليا / قولتله أن عمر استأذن بابا وعزمني على الغدا بعد الجامعة وأنا رفضت اروح لوحدي واصريت تيجي معايا انتي و رودي.
ولما سألني تليفونك مقفول ليه قولتله فصل شحن
قالي طب ادهالي قولتله مشيت هي و رودي ورودي هتوصلها فقفل وأنا روحت جاية على هنا بسرعة. لقيته اتصل كذا مرة على تليفون البيت عشان يكلمك
شمس بتنهيدة حارة/ طب خلاص ماتقلقيش أنتي وانا هطلع أكلمه.
داليا / ماشي ولو احتجتي حاجة نادي عليا
( ثم قالت لها بصوت مليان دفء وحنان ) وبعدين
مش لازم كل ماتروحي المقابر تبكي كدة يا شمس عشان هتتعبي
شمس بأبتسامة باهتة / ماتقلقيش أنا كويسة. انا هطلع بقى عشان اكلم مهاب
@@@@@@@@@@@@@
فتحت شمس تليفونها بعد ما شحنته شوية
واتصلت بمهاب وما هي ثواني معدودة حتى رد عليها بصوته الغاضب
مهاب بصوت عالي/ لسه فاكرة انك تكلميني. لما اتصلت عليكي ماردتيش ليه و قفلتي تليفونك.ليه وازاي تخرجي.بدون أذني
شمس بهدوء وصدق / وحشتني أوي يا مهاب ( وبدأ صوتها يختنق بسبب البكاء)
ما ترجع بقى كفاية كدة انت وحشتني أوي أوي
مهاب بمجرد ماحس إنها بتعيط نسي كل غضبه/ شمس أنتي بتعيطي
مالك يا شمس
شمس مسحت دموعها وحاولت تتكلم عادي / ماليش بس انت وحشتني أوي صحيح انت كنت بتفضل طول النهار برة في شغلك لكن على الأقل كنت حاسة انك قريب مني. وبنام في حضنك
مهاب بهدوء / حبيبتي أنتي كمان وحشاني اوى والله. ماتعرفيش أنا قلقت عليكي اد ايه لما ماردتيش عليا وبعدها تليفونك اتقفل
وكمان بتصل بالسواق قالي ان داليا طلبت منه يرجع القصر وانتوا مارجعتوش معاه
شمس / انا والله غصب عني ماسمعتش التليفون لأني ببقى عملاه صامت وأنا في الجامعة عشان المحاضرات ولما خلصت ما انتبهتلهوش وهو فصل شحن
وانا اضطريت اروح مع داليا لان لو ماكنتش روحت معاها ماكنتش هي راحت وكانت هتتكثف. بس انا روحت معاها وبعدين سبتها ومشيت
مهاب بتنهيدة / خلاص يا حبيبتي المهم انك كويسة
شمس / أنا طول ما انت بعيد عني مش هبقى كويسة يا روح قلب حبيبتك
مهاب / ايه الكلام دا ياريتني كنت سافرت من زمان عشان اسمع منك الكلام الحلو ده
شمس / دا مش كلام دي حقيقة والله أنا بحبك وبموت فيك وبعشقك. وأنت وحشتني أوي و وحشني حضنك
( كانت هذه الكلمات كفيلة بأن تشعل نيران شوقه اليها وتجعل قلبه يطير فرحا فها هي تثبت له انها تعشقه
ولكن مهلاً هي لم تعشقه كما يعشقها هو )
أنهوا المكالمة بعد وقت طووووويل
دخلت شمس إلى الحمام وأخذت شاور دافئ. وتوضأت وخرجت
وصلت فرضها
ثم سجدت بين يدي خالقها لكي تدعوه بأن يصلح حالها ويشفيها
وظلت تدعي ربها وتقرأ في كتاب الله كثيرا
حتى ميعاد العشا
نزلت واتعشت مع العيلة برغم انها ماكنتش عايزة تاكل لكن أكلت غصب عنها وحاولت على اد ما تقدر تخفي ما بداخلها من الم وحزن
وبعدين استأذنت وطلعت الجناح. فتحت شنطة اليد بتاعتها وأخرجت منها الأدوية اللي اشترتها في طريق عودتها للقصر ثم تناولتها وكانت عبارة عن3 أنواع لأجل مرضها ونوعا آخر لمنع الحمل
لأن الدكتور حذرها من خطورة الحمل في هذه الفترة
وبعد ذلك ظلت تذاكر حتى شعرت بالنعاس فذهبت الي السرير ونامت
@@@@@@@@@@@@
الساعة 2 منتصف الليل
دخل مهاب بهدوء إلى جناحه. ثم اقترب منها وهي نائمة. ولكنها شعرت به
نعم علمت بوجوده وصلت رائحة عطره إلى انفها. حست بالأمان بمجرد شعورها انه موجود جنبها
فتحت عنيها عشان تتأكد إنه موجود فعلا
وشافته ادامها
اصطدمت عيناها بعينيه نظرة شوق ولهفة وحنين
ظلت ترمش عدة رمضان لكي تتأكد إنها لا تحلم وأنه بالفعل موجود بجانبها
أما هو فعندما لاحظ انها ترمش لتتأكد من وجوده احتضنها بقوة.
___________________________
رواية( شمس وسط الظلام) البارت(36) بقلم:- أسماء أبوشادي
____________________________
مهاب حضن شمس. بقوة اشتياقه لها
شمس حاوطته هي كمان بزراعتها وبدأت في البكاء. ولكن بهدوء. هي بتحاول انها تتحكم في نفسها وفي بكائها خوفا من ان يوجعها قلبها وتسرع دقاته وهي في حضن مهاب
مهاب بقلق / حبيبتي بتعيطي ليه. أنتي مش مبسوطة اني جيت
شمس بعدت عن حضنه شوية ومسحت دموعها بايدها / لا طبعا مبسوطة جدا وانا بعيط من فرحتي انك جيت
مهاب بأبتسامة / يعني عايزة تقوليلي كل الكلام اللي قولتيه دا في التليفون وماجيش دا انا كنت اتمنى أغمض عيني وافتحها الاقي نفسي ادامك
شمس / بحبك وحشتني اوى دي احلي مفاجأة عملتها
مهاب حضنها مرة تانية جامد حتى كادت ضلوعها أن تنكسر بين يديه
ولكن كل ما كان يشتد من احتضانها كانت هي تشعر بالأمان والراحة
وكأن حضنه أصبح لها دواء من كل ما هي فيه
مهاب / أنا حاسس انى بحلم. مش مصدق نفسي شمس انا مجنون بيكي. بحبك اووووووي. بعشقك. يا شمسي
( ذهبوا معاً لدنيا العشق وبحور الهوا حيث عالمهم الخاص )
___________________
الصبح نزلوا سوا للفطار
والعيلة كلها اتفاجأت بيهم
سهى / مهاب. أنت جيت
مهاب بهدوء وهو بيقعد مكانه / حضرتك شايفه إيه
سامح بأستغراب / بس مش ميعادك لسه يوم الخميس
مهاب / بس الشغل خلص الاتنين إيه اللي يخليني استنى ليوم الخميس
داليا / الحمد لله على سلامتك يا ابيه
مهاب بأبتسامة لأول مرة يبتسمها في وش داليا أو حتى اي حد من البيت / الله يسلمك يا حبيبتي
داليا مش فاهمه هو بيقولها هي ولا لاء. وفعلا شكت إنه ممكن يكون بيكلم شمس
خلصوا فطار. و داليا قامت من على السفرة
داليا / مش يلا بقى يا شمس عشان مانتأخرش
شمس / روحي انتي يا داليا. وانا هبقى انقل منك المحاضرات.
داليا بأبتسامة / خلاص خليكي يا حبيبتي وانا مش هفوت كلمة غير لما اكتبهالك
_____________________
بتمر الأيام على الكل بسعادة كبيرة جدا
مازن و جميلة :- قربوا لبعض جدا. وجميلة اعترفت بحبها لمازن وقرروا أنهم يتخطبوا بعد ما مازن يخلص السنة دي عشان يكون اتخرج
داليا وعمر / قربوا من بعض أوي اوى اوى. وبيرغوا في الفون بالساعات وبيقعدوا مع بعض في الجامعة كتير وعمر بيروح يزورهم ويذاكرلها كل اللي محتاجاه وأوقات عمر و داليا بيطلبوا من شمس تقعد معاهم وهو بيذاكرلها لكن هي اساسا مابتبقاش محتاجة للمذاكرة دي لأنها بتبقى فاكرة كل اللي اخدته في الجامعة او حتى اللي بتقرأه من الكتب و داليا بتغير جدا على عمر من كل بنات الجامعة. بس هو دايما بيثبتلها إنه مابيحبش غيرها ومش شايف بنات غيرها أبدا
رودي و أحمد :- تقريبا كل يوم مع بعض وبقوا بيتكلموا على الواتس والفون وأحمد بيساعد رودي دايما في دراستها
والاتنين بيحبوا بعض لكن ما اعترفوش لبعض بأي حاجة
وأحمد بيغير على رودي مووووت لما يشوفها بتهزر مع مازن أو عمر في كافترية الجامعة
نيجي بقى لحد مابنتكلمش عنه بقالنا كتير
عاصم أبو شمس :- دا بقى حالته حالة افتكر دلوقتي انه عنده بنت لما بعدت عنه ومابقاش يشوفها. ندمان على كل لحظة كان فيها بعيد عن بنته وبيروح دايما المقابر عند أمها ويقعد يتكلم معاها بالساعات ومابيمشيش غير بالليل. وبيقولها أن مهما تفوت سنين هو عمره ما هينساها
شمس و مهاب :- أصبحوا الاتنين واحد. مهاب بقى بيرجع البيت بدري. وبيقضي اكتر وقت ممكن مع شمس وكل يوم يجيبلها شكولاته ومانجا وأحيانا ورد. ومعاملته اتغيرت مع الكل مع امه وأبوه مع العيلة كلها
واتقرب من مازن و داليا
ومازن حكاله كل حاجة عن علاقته بجميلة
أما داليا فبقت تتكلم معاه من غير خوف وتوتر
شمس :- كل يوم بتحب مهاب اكتر من اليوم اللي فات بتاخد علاجها بس اوقات كتير بتهمله بسبب أن مهاب بيكون معاها ومابتعرفش تاخده. وبتتابع مع الدكتور بالفون لكن مابتقدرش تروحله العيادة بتاعته أو المستشفى
والدكتور مقدر وضعها لكنه قلقان ودايما بيطلب منها انها تروحله العيادة عشان يعملها فحوصات
لكن كالعادة شمس بترفض بس بتحاول على اد ما تقدر تمشي على تعليماته ما بتتضحكش كتير زي الاول
يعني لما بتلاقي داليا ومازن. و رودي بيضحكوا بتقوم وتحاول تلهي نفسها في اي حاجة عشان ماتضحكش معاهم. مابقتش بتجري ولا تنزل السلم وتطلع كتير عشان ماتحسش بوجع في قلبها
ومن يوم ماراحت المقابر لما كانت تعبانة مارحتش تاني
ومهاب طبعا مبسوط أنها بقالها فترة طويلة مابتروحش المقابر خالص ولا حتى بتجيب سيرتها
وافتكر انها بكدة نسيت مروان
_________________________
طبعا فات وقت كتير على الاحداث دي. اكتر من شهرين تقريبا وامتحانات الترم خلصت والبنات الحمد لله واثقين من نجاحهم وتفوقهم كمان لانهم كانوا بيذاكروا بجد واجتهاد
النهاردة اول خميس بعد انتهاء امتحانات نصف العام الدراسي.
خطوبة عمر و داليا
مهاب ساب قرار حفلة الخطوبة لداليا وعمر
وهما قرروا يعملوها في القصر.
ومهاب استدعى أكبر مصممي حفلات في البلد عشان يجهزوا للحفلة
وفعلا تجهيزات الحفلة مدهشة جدا
داليا كانت لابسه فستان نبيتي جميل جدا طويل وبديل ومنفوش شوية من تحت وكان الميكب بتاعها بسيط لكن في غاية الروعة
رودي كانت لابسه فستان افويت قصير إلى قبل الركبة بقليل وميكب بسيط لكن جعل منها فاتنة وطبعا أحمد كان موجود لان عمر عزمه علشان هو زميله ويعتبر صاحبه
وأول ماشفها بالفستان ولع من غيرته عليها
جميلة حضرت الحفلة وكانت لابسه فستان وردي طويل ورقيق جداً به حزام أزرق من أعلى الخصر وحجاب باللون الأزرق نفس لون الحزام واكتفت بوضع كحل في عينيها وملمع شفايف شكلها كان جميل جدا مازن انبهر بشكلها وجمالها أول ما شافها
لأنه طبعا هو اللي راح جابها من أول شارعها عشان ماحبش إنها تيجي لوحدها
نأتي للشمس
نعم الشمس فهي اسم على مسمى
شمس لبست فستان أسود باكمام به حزام من قشر السمك من اسفل الصدر
ضيق من عند الصدر ثم ينزل بأتساع و طويل من الخلف يصل الى الارض وقصير من الامام يصل إلى الركبة
ولبست تحته بنطلون استرتش أسود طويل
و حجاب من اللون الأسود اللامع. وما زاد جمالها اكتر ذلك الكحل الأسود الذي حاوطت به عينيها بشكل جذاب
( صحابها كانوا معترضين على اللون طبعا عشان اسود واقترحوا عليها تاخد نفس الفستان بس بلون تاني أو تلبس بنطلون وطرحة بلون غير الاسود لكن هي أصرت على اللون دا
برغم ان كل حاجة كانت لبساها سودة حتى الجزمة والكحل اللي في عنيها إلا انها لفتت انظار الكل
والأسود اظهر جمال بشرتها الطبيعي ولون عنيها وحمرة خدودها. كانت هي ملكة الحفلة بجمالها
مافيش حد شافها غير لما ماقدرش يرفع عينه عنها
مهاب درجة حرارته بقت اكتر من 1000 درجة مئوية بسبب عيون الناس اللي مش عايزة تترفع عن شمس
حتى ابوه وعمه عكسوها ادامه
شمس برغم الفرحة اللي حساها عشان داليا إلا أن في حاجة موتراها جدا. بس بتخبي توترها عن اللي حوليها وبتبتسم.
مهاب حاسس ان شمس متغيرة بقالها كام يوم لكن مش عارف ايه اللي مغيرها وسألها اكتر من مرة وهي كانت بتتحجج بالامتحانات
خلصت الامتحانات اتحججت بخطوبة داليا والتجهيزات.
وهو قرر انه ياخدها ويسافروا اي مكان يقضوا يومين حلوين عشان يريحها من الضغط النفسي. بس هيعملهالها مفاجأة
في الحفلة
مهاب مش.عايز يسيب ايد شمس ابدا. وأي حد بيبصلها هو بيبصله بنظرة كفيلة إنها تخليه يبعد عيونه عنها
شمس بأبتسامة كاذبة / حبيبي انت هتفضل ماسك إيدي كدة طول الحفلة
مهاب / ايوة طبعا أنتي مش شايفة الناس بتبصلك أزاي
شمس / خليهم يبصولي بس انا مافيش في عنيا غيرك ولو ركزوا فيها هيشوفوا صورتك واسمك اللي حفظتهم في عيوني
مهاب بأبتسامة / شمس. بلاش الكلام دا بدل ما اخدك ونطلع على الجناح بتاعنا
شمس / خلاص يبقى سيبني بقى عشان اروح أرحب بزمايلنا في الجامعة
مهاب بجدية / نعم شمس أنتي مش هتتحركي خطوة واحدة من غيري وأنا مش هسيب ايدك وانتي مش هترحبي بحد ما العيلة كلها واقفة بترحب اهي مش مكفينك
شمس بأبتسامة / يالههههههووووي على حبيبي لما بيغير شكله بيبقى عسل
مهاب / يعني مابيبقاش عسل غير لما أغير بس
شمس بأبتسامة/ لاء
أنت عسل وأنت غيران
وقمر وأنت فرحان
وسكر وانت زعلان
مهاب / طب وانا متعصب ببقى إيه
شمس بمرح / ما بلاش اقولك دي
مهاب / لاء بقى انا مصمم اعرف
شمس بدلع/ هقولك بس عندي طلب وبلييييييز مهاب توافق عليه لأنك لو رفضت أنا هزعل جدا
مهاب بأبتسامة / وانا مقدرش على زعلك أبدا يا شمسي اطلبي اللي انتي عايزاه
شمس بتردد / في اغنية داليا بتحبها وأنا عايزة اغنيهلها هدية خطوبتها
مهاب بضيق / انتي عايزة تغني ادام الناس دي كلها
إذا كنت أنا متضايق وهما بيبصوا عليكي وأنتي جنبي ما بالك لما يبصوا عليكي وأنتي بتغني وهما بيسمعوكي ومسحورين بصوتك اللي يسحر دا
شمس بزعل / خلاص يا مهاب مش هغني ولو تحب اسيب الحفلة واطلع الجناح انا موافقة
مهاب برومانسية / طب ليه الزعل طيب أنتي عارفة انى مابستحملش أشوف حد بيبصلك
شمس / بس انا كان نفسي اغني الأغنية دي النهاردة
مهاب بأبتسامة / خلاص يا حبيبتي موافق انك تغني لأني ماقدرش على زعلك بس هتغني وأنتي جنبي هروح واقف معاكي ومش هتقفي على الاستيدج عشان العيون ماتبقاش عليكي
@@@@@@@@@@
مهاب وشمس راحوا بأتجاه منظمين الحفلة.
شمس طلبت منه يشغل موسيقى للاغينة اللي هي عايزاها واخدت الميك وراحوا وقفوا جنب داليا اللي قاعدة جنب عمر وهما الاتنين في غاية السعادة
شمس بصت لداليا واتكلمت في الميك
شمس بأبتسامة / 1000 مبروك يا داليا.يا احلى أخت في الدنيا ربنا يوفقلك أنتي وعمر. وعقبال الفرح ان شاء الله
أنا حابه اهديكي اغنية بمناسبة الخطوبة واتمنى انها تعجبك
شمس غنت اغنية ( حبيته بيني وبين نفسي ) بتاعة شرين
( مش هكتب الأغنية عشان الناس مايقولوش الحلقة كلها اغاني )
الأغنية كانت جميلة جدا. وطبعا داليا عجبتها الأغنية لأنها بتحبها وكمان هي زي قصتها مع عمر اللي حبته بينها وبين نفسها
عمر اخد داليا ورقصوا رومانسي على صوت شمس وهي بتغني
أما مهاب فكان واقف قصاد شمس بيحاول يخبيها عن عيون الناس. بضخامة جسمه
وكالعادة كلما غنت شمس انبهر الكل بصوتها.
بعد ما الاغنية خلصت اشتغلت اغاني شعبية والكل طلع على الاستيدج عشان يرقصوا مع داليا وعمر.
وطبعا رودي طلعت وجميلة ومازن
شمس شدت مهاب من ايديه وطلعوا رقصوا معاهم
ودي كانت الصدمة للكل ان مهاب يرقص. حاجة ماحدش يتوقعها برغم انه اتغير لكن مش للدرجة دي
وسط زحمة الرقص. أحمد شد رودي من زراعها بالقوة واخدها بعيد عن الناس من غير ما حد يلاحظ
أحمد بغضب / ممكن افهم أيه اللي انتي بتعمليه دا
رودي بضيق / أنت بتكلمني كدة ليه وايه اللي انا عملته يخليك تسحبني زي الجاموسة كدة من وسط صحابي وأنا برقص
أحمد / يعني عيزاني اشوفك واقفة بترقصي أدام الناس كدة واسكت. وكمان ايه اللي انتي لبساه دا
رودي / والله انا برقص مع صحابي عشان دي خطوبة صاحبتي وأنا فرحانلها. أما لبسي فأنا حرة ألبس اللي انا عايزاه ماحدش له حاجة عندي
أحمد بغضب / لا أنتي مش حرة. وأنا بقولك مافيش رقص أدام حد واللبس دا مايتلبسش تاني يا رودي فاهمه
رودي بغضب / لا مش فاهمه
أنت ازاي تدخل في حياتي كدة وبصفتك إيه
أحمد بصوت عالي/ بصفتي حبيبك. أيوة انا بحبك يا رودي
رودي كانت منتظرة منه الكلام دا من زمان وكانت يأست أنه يعترفلها بحبه ليها
لكن اول ما قال الكلمة دي دقات قلبها ذادت وفرحت جدا
أحمد قرب عليها / بحبك وبموت فيكي وبغير عليكي
رودي لو انتي مابتحبنيش أو مش عايزاني قوليلي وأنا هبعد عنك خالص ونفضل صحاب زي ما احنا
( رودي ساكتة ومابتردش عليه )
أحمد / خلاص يا رودي انا مش هضغط عليكي أنا
رودي قاطعته / انا بحبك
أحمد فرح جدا وحضنها وكان مبسوط انها طلعت هي كمان بتحبه رودي بعدت عنه بهدوء. ورجعوا للحفلة مع بعض عشان تكون مع صحابها @@@@@@@@@!!
واحدة صاحبة سهى و نوال في النادي وفي الجمعية الخيرية اللي عملنها سوا
قربت عليهم. وكانت بتطلب منهم ايد شمس لابنها
نوال / انتي قصدك على مين أنا معنديش بنت غير داليا
الست / لاء البنت اللي كانت بتغني من شوية وقالتلها أنتي احلى اخت في الدنيا
سهى بصدمة / انتي قصدك علي شمس
الست / هي اسمها شمس
فعلا اسم على مسمى
سهى بتكبر. ( طبعا هي فرحانة ان الكل مبهور بجمال مرات ابنها ) / دي تبقى مرات مهاب ابني.
الست اتصدمت واندهشت طبعا لأن شمس يبان عليها انها صغيرة جدا ومش ظاهر انها متجوزة أبدا. خصوصا انها لسه لحد الآن مالبستش الشبكة اللي كان مهاب جايبهلها قبل كتب الكتاب
الست اعتذرت ومشيت
لكن نفس الموقف دا كان هيتكرر بس للاسف كان مع الشخص الغلط
شاب ابن رجل اعمال كبير في البلد قرب على مهاب وهو ماسك ايد شمس وماشي بيها وسط الحفلة
الشاب بأبتسامة مد ايده / ازيك يا مهاب باشا
مهاب مد ايده وسلم عليه ورحب بيه لكن بهيبته برضوه
الشاب كان هيمد أيده ويسلم على شمس لكن مهاب مسك ايديه هو
مهاب بضيق يخفيه / االمدام مابتسلمش ( وابتسم ابتسامة صفرة )
الشاب بلع ريقه بتوتر وحمد ربنا انه ما اتكلمش مع مهاب لأنه كان هيطلب منه يكلمه على انفراد ويخطبها منه
خلصت الحفلة على خير الحمد لله والكل كان مبسوط لكن شمس كانت متوترة جدا وبرضوه خايفة وتعبانة لكن بتخفي كل دا عن اللي حواليها خصوصا مهاب
____________________________________
تاني يوم الصبح بعد الفطار شمس طلبت من مهاب انها تخرج تروح بيت عمها لأنها مارحتش من فترة. وكمان أخواتها ومحمد ماجوش عندها بقالهم اكتر من شهر
مهاب ما اعترضش وقالها انه هيروح معاها يوصلها لكن هي رفضت وقالتله ان السواق هيوصلها
مهاب وافق وسابها على راحتها
السواق وصلها بيت عمها وهي دخلت وقعدت مع عمها ومراته لحد العصر وبعد كدة استأذنت منهم ومشيت بدون ماتتصل بمهاب عشان يبعتلها السواق زي ما اتفقوا
شمس راحت المستشفى بتاعة الدكتور اللي متابع حالتها وكشفت عنده قبل كدة
وبعد السلام وبداية الكلام
الدكتور / ايه يا بنتي كل دا فين من يوم ماطلبت منك تيجي عشان تعملي الاشاعة والفحوصات
شمس / دكتور انا عملت اختبار حمل في البيت وطلع إيجابي
الدكتور بصدمة / ايه ازاي دا حصل. أنتي ماكنتيش بتاخدي الأدوية اللي انا وصفتهالك
شمس / انا كنت باخدها لكن للأسف في اوقات ماكنتش بقدر اخدها عشان جوزي كان بيبقى موجود وخوفت يعرف لما يشوفني باخدها
الدكتور بقلق / احنا لازم نتأكد الاول من أن في حمل ونعمل إشاعات وفحوصات ودلوقتي قبل كمان شوية
___________________________
نكمل في الفصل الجاي
